කඳුලට සිනහවක්
වැඩිහිටි නිවාසවල සිටින වැඩිහිටියන්ගේත් ළමා සංවර්ධන මධ්‍යස්ථානවල සිටින දරුවන්ගේත් රසාස්වාදය පිණිස දියත් කරනා වැඩසටහනයි කඳුලට සිනහවක්. මෙම වැඩසටහන තුලින් වැඩිහිටියන්ට විනෝදයෙන් ගතකල තම තරුණ අවධිය නැවත මතක් කර ගැනීමටත්, දරුවන්ට තම සැඟවුණු දක්ෂතාවන් එලි දැක්වීමටත් මහඟු අවස්ථාවක් උදා වෙනවා.
ජුනි මාසය පුරාවට කඳුලට සිනහවක් වැඩසටහන් 9ක් තුලින් දරුවන් සහ වැඩිහිටියන් 522කගේ සිතට සැනසුමක් ගෙන එන්නට හැකි විය.
වැලිසර දෙව්සිසිරි සෙවණ වැඩිහිටි නිවාසයෙහි පැවැත්වූ කඳුලට සිනහවක් වැඩසටහන වර්ණවත් කරන්නට ආදරනීය කලාකරුවන් දෙපලක්වන ශ්‍රියානි අමරසේන මහත්මිය සහ වීනා ජයකොඩි මහත්මිය සහභාගී වූ අතර, වැඩිහිටියන් ඉතාමත් ප්‍රීතියෙන් ඔවුන් සමඟ නටමින්, ගයමින් විනෝද වූහ.
ඊට අමතරව, ජනවාරි මාසය තුළ තවත් වැඩිහිටි නිවාස සහ ළමා සංවර්ධන මධ්‍යස්ථාන හයක, 331 පිරිසකගේ සිත් සතුටින් පුරවාලන්නට අප සංගීත කණ්ඩායමට හැකි විය.
පරක් තෙරක් නොපෙනෙන මහා සයුරක් සේ මවගේ පියාගේ ගුණ සීමාකොට දැක්විය නොහැකිය. එතරම්ම දරුවන් පිළිබඳව ඇති මව්පිය සෙනෙහස අසීමිතය. කුඩා කල සිට හොඳ නරක කියා දී දරුවන්ගේ ජීවිතයේ සාර්ථකත්වයට අඩිතාලම දමන්නේ අපේ දයාබර දෙමව්පියන්ය. දරුවන් වශයෙන් ඔවුන් වෙනුවෙන් කල හැකි යම් දෙයක් වේ නම් ඒ ඔවුන් ගතින් සිතින් දුර්වල වන අවධියේ ඔවුන්ව රැක බලා ගැනීමයි. නමුත් එය නොසලකා හරින පිරිසක්ද අප සමාජයේ ජීවත් වෙනවා. එවැනි අවස්ථාවල ඒ දෙමව්පියන්ට සිදු වන්නේ වැඩිහිටි නිවාසයකට වී තම ජීවිතයේ අවසාන කාලය ගත කිරීමටයි. එසේ දුක් සෝ සුසුම් මැද ජීවත් වන මව්පියන්ගේ සිත සුව පිණිස විශ්ව පාරමී අප දියත් කරනා වැඩසටහනයි කඳුලට සිනහවක් වැඩසටහන.ඒ අනුව, මෙම මාසයේත් වැඩසටහන් දොළහක් පවත්වමින් ඔවුන්ට විනෝද වන්නට අවස්ථාව සලසා දීමට අපට හැකි විය.
වැඩිහිටියන් කියන්නේ අපට සම්පතක්. ඔවුන්ව රැක බල ගැනීම අපේ යුතුකමක්. නමුත් දරුවන් ගමෙන් නගරයට සංක්‍රමණය වීම, අධික කාර්යබහුලත්වය වගේම, ඇතැම්විට දෙමව්පියන් ගැන නොසලකා හැරීම වැනි විවිධ හේතූන් නිසා අද වන විට බොහොමයක් දෙමව්පියන්ට තමන්ගේ අවසාන කාලය වැඩිහිටි නිවාසයකට වී ගත කරන්න වෙලා තියෙනවා. මේ හැමෝම ඒකාකාරී ජීවන රටාවක් තුළ පාළුව, කාන්සිය වැනි විවිධ මානසික වියවුල් සමග ජීවත් වන්නේ. සංගීතය කියන්නේ මනසට සුවයක් ලබා දිය හැකි හොඳ ඔසුවක්. ඉතින් කඳුලට සිනහවක් වැඩසටහන යටතේ ඔවුන්ට ගී ගයමින් විනෝද වෙමින් ඒ ඒකාකාරී ජීවන රටාවෙන් මිදෙන්නට ඉඩ හසර සලසා දෙනවා. ඒ අනුව මෙම මාසය තුළ කඳුලට සිනහවක් වැඩසටහන් 13ක් පැවැත්වීමට හැකියාව ලැබුණි.
කුඩා කල සිට අප කෙරෙහි වූ දැඩි දාරකස්නේහයෙන් යුතුව කටයුතු කරනා දෙමව්පියන් හට යම් දිනකදී කාත් කවුරුත් නැති මහළු මඩමක තනි වීමට සිදුවනවා නම් සැබවින්ම අප සමාජයක් වශයෙන් පිරිහීමට ලක් වී ඇති බවට කදිම උදාහරණයකි. ඉතින් එවන් උදවිය සොයා යන ගමනේ ඇරඹුමයි කඳුලට සිනහවක් වැඩසටහන. ඒ අනුව මෙම මාසය තුලදී කඳුලට සිනහවක් වැඩසටන් 12 පවත්වා ඇත.
