රුහුණු සුව නිවහන
සමාජයෙන් සරණක් නොමැතිව අසරණව සිටින එවන් මිනිසුන්ගේ ජිවිතයට නව බලාපොරොත්තු ඇති කරමින් ඔවුන්ගේ අවශ්‍යවතාවයන් සපයා දීම විශ්ව පාරමී පදනම විසින් කරන ලබන තවත් එක් සැදැහැවත් කටයුත්තකි.
2022 වසරේ ගෙවුණු මාසයන් තුළදී අපි ඔවුන්ගේ ඉල්ලීම පරිදි එම අහිංසක මිනිසුන් සිදු කරන වගා කටයුතුවල, විවිද අත්කම් නිර්මාණ, විනෝදාත්මක වැඩසටහන් ඇතුළු නොයෙකුත් ක්‍රියාකාරකම් වෙනුවෙන් අවැසි සියලුම අවශ්‍යතා සපුරාලනු ලැබීය.
උදෙන්ම අවදි වී කඩිමුඩියේ කුමක් හෝ රස්සාවකට යන හැමෝම ගොම්මන් අඳුරත් එක්ක ගෙදරට ගොඩ වෙන්නේ තමන් ආදරේ කරන අයගේ උණුසුම රැකවරණය ගෙදර තියෙනවා කියලා දන්න නිසාමයි. ඒත්, අවුවෙන් බේරෙන්නවත්, වැස්සෙන් නොතෙමෙන්නවත්, දුක සැප හොයල බලන්නවත් කාත් කවුරුත් නැති වුණු යාචකයන් පාරේ යන කාට හරි අතපාලා ඉල්ලගත්ත දෙයකින් බඩගින්දර නිවාගෙන එතනම වැටිලා නිදාගත්තේ ඒ ජීවිතේ සැප හින්ද නම් නෙමෙයි.
මේ වගේ මහ පාරේ හිඟමනට වැටිලා හිටපු මේ අසරණයන්ගේ දුක් කඳුළු කතා නිමා කරල දෙන්න සමාජ සුභ සාධන අමාත්‍යාංශය මැදිහත් වුණා. ඒ රුහුණු සුව නිවහන හා රජයේ නිවර්තන නිවාසය නමින් නිවාස දෙකක් ඔවුන් වෙනුවෙන් ඉදිකර ඔවුන්ගේ සියලු අවශ්‍යතාවයන් සපුරා දෙමින් ඔවුන්ව රැක බලා ගනිමින්.
තවත් කෙනෙක් ලස්සනට ජීවත් වෙනවා දකින්න කැමති විශ්ව පාරමී අපි මේ හැම කෙනෙක්ගෙම සනීපාරක්ෂක කටයුතු වලට අවශ්‍ය සබන්, හාර්පික්, ඩෙටෝල්, රේසර් ඇතුළු සෑම අවශ්‍යතාවයක්ම ලබා දෙන්න සෑම මාසෙකම කටයුතු කරනු ලබනවා.
රැයක් දවාලක් නොමැතිව වීථි පුරා ඇවිද යමින් නෙත ගැටෙන සියල්ලන්ටම අත පෑවේ කුස පුරවාගන්නට යමක් සොයා ගන්නටයි. එහෙත්, අත රැදුණු දුර්වර්ණ වූ කෝප්පය පිරුණේ කාසි වලින් නොව හී පහරවල් බඳු වදන් වලිනි. මේ, මහ මඟ සිඟමන් යදින යාචකයන්ගේ සැබෑම ජීවිත කතාවයි.
තවද, තරුණ ජවය සමඟ උරෙනුර ගැටෙමින් ඇඟේ හයියට වඩා හිතේ හයියෙන් ඔවුන් වැඩ කළේ ගතට සිනිඳු ඇඳුම් හෝ හිසට මහා මන්දිර වෙනුවෙන් නොව, එදිනෙදා ජීවිතය ගැට ගසා ගන්නට වෙනත් මගක් නොවූ නිසාවෙනි…. මේ සමාජයේ තවත් කොටසක් වූ නාටාමිවරුන්ගේ කතාවයි..
එමෙන්ම, අසරණ කම නිසාවෙන් හෝ මුදල් වුමනාව නිසාවෙන් හෝ වෘත්තියක් වශයෙන් ගණිකාවන් වූ ඔවුන් සඳහාත්..
මානසික රෝග වලින් පෙළෙන නමුත්, ප්‍රතිකාර සඳහා යොමු වන්නට හෝ ප්‍රතිකාර වලින් සුව නොවී සමාජයේ ජීවත් වන මානසික රෝගීන් සඳහාත්…
ඇතුළු මේ සිව් පිරිසම වෙනුවෙන් සමාජ සුභසාධන අමාත්‍යාංශය මඟින් තැනූ නිවහනයි රුහුණු සුව නිවහන හා රජයේ නිවර්තන නිවාසය….. මෙහි ජීවත්වන 600කට ආසන්න පිරිසක් වෙනුවෙන් ඔවුන්ගේ සනීපාරක්ෂක අවශ්‍යතා සපුරා දීම 2017 වසරේ සිට මේ දක්වා අප සෑම මසකම සිදු කරන තවත් පින්සාර කටයුත්තක්.
ඒ අනුව, ඔවුන්ට අවශ්‍ය සබන්, ඩෙටෝල්, හාර්පික්, ලයිසෝල්, රේසර් වැනි ද්‍රව්‍ය වලට අමතරව කෘෂිකාර්මික කටයුතු සඳහා මල් පෝච්චි, උදළු, කැති සහ වතුර ගෙනියන බාස්කට් ඇතුළු මෙකි නොකී බොහෝ දෑ අප ලබා දෙන්නේ මහත් වුවමනාවෙන්. දැලි කුණු වලින් පිරුණු ඇඳුම් කඩමාල්ලෙන් මහ මඟ වැටී වුන් ඔවුන් මෙසේ ඉතා ප්‍රියමනාප ලෙස අපේ නෙත් ගැටෙනා විට අප හදවත් තුළ ඇති වුනා වූ අප්‍රමාන සතුට ඔබ සැමගේ සිත් තුලද ජනිත වේවා.
ඔබ මේ පහත ඡායාරූපවල දකින්නේ ලංකාවේ වෙනත් ප්‍රදේශයක ගොවිපොළක් නම් නොවේ… මේ කිසිවකුගේ හව්හරණක් නොමැතිව අන්ත අසරණව මහ මඟට වැටුණු යාචකයන්, නාටාමිවරුන් ඇතුළු ජීවිතයේ සැඳෑ සමය මහ මඟ උරුම සිටි සිටි එහෙත්,රජයේ නිවර්තන නිවාසයට එන්නට වරම් හිමි වූ ඔවුන් අප රටේ ආර්ථිකයට දක්වන්නා වූ සුවිශාල දායකත්වයයි.
බලන්න… කිසිවෙකුටත් බරක් නොවී ජීවත් වන්නට වෙර දරන ඔවුන්ගේ හැකියාවන් මල් ඵල දරා ඇති සැටි දකින ඔබගේ සිත්ද තුටින් පිරී යනවා නොඅනුමානයි.
